རིག་གཞུང་ཞིག་གི་རྨང་གཞི་གསར་ཏུ་འདིང་བ་དེ་ནི་ཚོང་རྫས་གསར་བ་ཉོས་ཏེ་སྐྱེལ་འདྲེན་བྱེད་པ་ལྟ་བུ་ཞིག་མ་ཡིན་པར་མི་རིགས་ཤིག་གི་མ་འོངས་འབྱུང་འགྱུར་གྱི་འཕེལ་སྟོབས་དང་འབྲེལ་དམ་ཞིང་། སྔར་མཆིས་རིག་གཞུང་ལ་ངར་ལྡུད་རྐང་གསོ་ལྟ་བུའི་ཡར་རྒྱས་ཀྱི་བྱེད་ལས་གལ་གནད་ཅན་ཞིག་ཡིན་པས། ༡༽རིག་གཞུང་དེ་འཛུགས་སའི་སྤྱི་ཚོགས་ཀྱི་དངོས་ཡོད་གནས་སྟངས་དང་། ༢༽འཛུགས་རྒྱུའི་རིག་གཞུང་དེའི་རྩ་ལག་གི་རྣམ་བཞག། ༣༽སྤྱི་ཚོགས་ཡར་རྒྱས་གཏོང་ཕྱོགས་དང་འབྲེལ་བའི་དེང་རབས་བསམ་བློ་བཅས་གསུམ་གྱི་སྒང་ནས་བརྟག་དགོས་ཤིང་། འདས་པའི་མི་ལོ་༦༠ ཡི་ནང་གཞིས་བྱེས་གཉིས་ཀྱི་སྐྱེས་ཆེན་དམ་པ་ཁག་གིས་བོད་ཀྱི་སྤྱི་ཚོགས་ཡར་རྒྱས་འགྲོ་ལུགས་ཐད་ཐུགས་དགོངས་བཞེས་ཚུལ་སྣ་ཚོགས་ཕྱོགས་བསྡུས་བརྒྱུད་དེ་སྤྱི་ཚོགས་རིག་པའི་སྒང་ནས་མཐོང་འགྲེལ་ག་ཚད་འགྲོ་ཐུབ་མིན་གྱི་བརྟག་དབྱེ་མདོ་ཙམ་ཞུ་བ་ལ།

ཡུལ་ཆོས་རྒྱུན་འཛིན་དང་ཞིབ་འཇུག་སྐོར་གྱི་བསམ་ཚུལ་ཞེས་པའི་རྩོམ་འདི་རྩ་བའི་ས་བཅད་ལྔ་ཡིས་གྲུབ་ཡོད་དེ། དང་པོ། སྔོན་འགྲོ། གཉིས་པ། ཡུལ་ཆོས་ཀྱི་གོ་དོན། གསུམ་པ། ཡུལ་ཆོས་ཞིབ་འཇུག་གལ་ཆེ་ཚུལ། བཞི་བ། ཡུལ་ཆོས་ཀྱི་རྣམ་བཞག་ལས། ཡུལ་ཆོས་ཐུན་མོང་དང་ཐུན་མོང་མ་ཡིན་པ་གཉིས་སུ་བཀར་ཏེ་བརྗོད་ཡོད། ལྔ་བ། མདོ་ལྷོ་ཡི་ཡུལ་ཆོས་གནས་བབ་དང་། དེར་ཐུན་མོང་དང་ཐུན་མོང་མ་ཡིན་པ་ཞེས་རིགས་གཉིས་སུ་བཀར་ཏེ་བརྗོད་ཡོད་ཅིང་། དྲུག་པ། ཡུལ་ཆོས་ཞིབ་འཇུག་ལ་མཁོ་བའི་དཔྱད་ཐབས་དང་། ནུབ་ཕྱོགས་པའི་ཞིབ་འཇུག་ནང་རྒྱུགས་ཆེ་པའི་དཔྱད་ཐབས་འགའ་དྲངས་པ་དང་ལྷན། བདུན་པ། མ་འོངས་པའི་རེ་བ་དང་བཅས་མཇུག་བསྡུས་སོ། །